ما العلاقه بين البدو و التحضر

طبعا اول رد ممكن تسمعه انه في فرق شاسع في التفكير بين المجتمعات البدائيه 

و التحضر في التقدم اساليب التفكير و هتجزم انه الفرق واضح و شاسع و انا اتفق معاك علي ده بس هنا في سؤال ....... هو هل في عوامل مشتركه بينا و بينهم ؟

طبعا لو كان ردك بكلمة لا فا انت غلطان عزيزي المشاهد ... ازاى يا جدع!!

هقولك انا في عالم اجتماع و انثروبيولجي فرنسي اسمه شتراوس الراجل ده كان بيتكلم كذا محور منهم اللغه و كان بيمثل اللغه بالشطرنج هتقولي ازاي يعني 

يعني يا سيدي كان بيقول ان قواعد الشطرنج بتكون ثابته بس اللي بيختلف فيها هي اشكال اللوحه او الخامات لكن ده ميمنعش انها ثابته و رجع الموضوع ده للغه 

قال ان كل اللغات قواعدها واحده لكن الكلام هو اللي بيختلف ... و اتنقل عم شتراوس من النقطه دي لنقطة الطوطم عشان يثبت مدى التشابه بينا و بين المجتمعات السابقة لينا او المجتمع البدوى تخيل معايا مثلا و انت في رحله سياحيه و روحت لقبيله بدائيه و لاقيت تمثال كده او طوطم و اهانته هيعملوا منك بطاطس محمره .. لأن الطوطم ده بيرمز للقبيله و ده حاجه مقدسه يعني الطوطم ده ممكن يرمز لحيوان معين مثلا هتقولي اه ما تفكير بدائي بقي يعني يموتونى عشان حته صخره منحوته ولا شعار هقولك اعذرهم يا عم ما انت كا مجتمع متقدم عندك نفس فكرة الطوطم دي هتقولي لا طبعا هقولك اعذرني اعلام الدول اللي بتمثلها هي بالنسبه ليها طوطم يعني لو حد مسك علم بلدك و اهانه انت نفسك هتعمل منه نفس البطاطس المحمره و هنا دي اول علاقه بينهم طب هو في علاقات تاني ؟؟ّ!! 

هقولك اه برضو جه عم شتراوس و قال علي محور تاني و هو الأساطير 

الراجل ده بيقول زي ما المجتمعات البدائيه كانت بتحكي اساطير الا ان الشعوب المتقدمه عندها برضو من الأساطير اللي تتحكي حواديت بتتنقل و هدفها بناء الخيال 

يعني ايه احنا بدائيين بقي ولا ايه ؟ ... 

برضو هقولك لا كل ما في الموضوع الراجل ده كان بيحاول يوصل اننا كا بشر كلنا واحد من حيث الفكر و انه مهما زاد التقدم و التطور الا اننا مترسخه فينا حاجات و في حاجات كتير بينا شبه بعض من تفكير لكله هو بس الفرق في الطبخه زي ما قال في كتابه اليئ و المطبوخ لو بسيط ليها هتلاقي ان كل الاكل واحد عناصره واحده لكن اللي بيختلف هو طريقة استخدام العناصر دي 

طبعا هيجي حد و يسأل طب ايه فايدة الاسطوره و هي حاجه من وحي الخيال مينفعش الواحد يجزم بوجودها ؟ هقولك ان الأسطوره دي هي منبع الخيال و فايدتها انها بتنور دماغك كده عشان تبدع يعني مثلا تخيل معايا لو محدش سرح بخياله و تفكيره ده في انه يخترع الموبايل اللي في ايدك ده ولا عمره كان هيبقي موجود 

يبقي فايدة الخيال انه بيساعدك علي الأبداع بس طبعا مش هوس الخيال انك بس تتخيل لا انت بتحول خيالك دا بقدر الامكان علي ارض الواقع و انه فطرة فينا اننا نتخيل نسرح نتأمل و كل الحاجات دي هي اللي وصلتك للتقدم ده مع التنفيذ 

و اخيرا فهمت ايه بقي العلاقه و التشابه اللي بين المجتمعات شكرا.. 😊