ابدأ الان بكتابة المحتوى على منصة كتاب القدس
سكت الحمار
بعد ما كان
مصدعنا
ليل ونهار
تعب من النهيق
وأكل العليق
وحلف
ما يكمل الطريق
وقرر الإنتحار
وادعى الخجل
وإنتفض وثار
إزاى
يضربوا بيه المثل
في الغباء والهبل
طول عمره
فاكر نفسه بطل
فيلسوف
في أسوأ الظروف
بيواصل العمل
وعمره
ما عرف في يوم الكسل
أستاذ
في فن الغزل
وله حكم وأشعار
وسكوته
لغز من الألغاز
يا ترى
إيه السبب
الحمار
فجأة أحتجب
يالا العجب
حل عليه التعب
ولا شطب جاز
أنا أصلي
للحمار منحاز
وفي قلبي له
حبة إعزاز
بجد ومش هزار
بعد رحلة كفاح
قرر الحمار
يرتاح
والحمير أقامت الأفراح
والليالي الملاح
وسهروا
لطلوع الصباح
الديك تعب
من كتر الصياح
وشقشق النهار
وسكت الحمار
للأبد
وفيه غيره
حمير ملهاش عدد
إحنا نبني
وهما نازلين هدد
شوطة
و ماشية في البلد
يموت حمار
ألف غيره يتولد
ساقية دايرة
باستمرار
و عشان تدور
لازم يغموا
لو عينه شافت النور
يرفض
ويثور
وساعتها
الأرض تبور
ويموت الخضار
بقلم
أحمد السعيد الفقي مصر
هذا المحتوى ملك للمسؤول alqudsbook.com موقع
© alqudsbook.com. كل الحقوق تعود الى كتاب القدس. صمم ل كتاب القدس