النرجسية شتيمة هذا العصر

"النرجسية شتيمة هذا العصر " ! 

مقدمة

واحد من أهم مساوئ الانفتاح المعلوماتي الرهيب الي احنا فيه أن أي حد ممكن يتطلع علي اي حاجة وبالتالي يتعامل علي أنه متيقن من المعلومة ومن إدراكه ليها . خصوصا مع انتشار الفيديوهات القصيرة وصناع المحتوى الباحثين عن الشهرة واعلاء نسب المشاهدة لزيادة الربح فإيه الوسيلة لكدا ؟!

انهم يتلاعبوا بمشاكل الناس وخاصة الأسرية واعطاء الآراء والتشخيص دون وعي كافي لجذب الإنتباه فبدلا ما يكونوا حل ومساعد احيانا ليكونوا سبب في خراب البيوت والشحناء .

ولا سيما موضوع النرجسية الي مفيش حد حابب يطلع تريند متكلمش فيها .

أخطاء يقع فيها البعض في تصنيف الاضطرابات النفسية

هقولكم علي مفاجأة 💥🎉

معظم الي انتوا بتقولوا عليهم نرجسيين مش نرجسيين ، لكن دا لا يمنع انهم مضطربين ولكن اضطرابات تانية غير النرجسية وبنصنفها بالحب غلط كدا على أنها نرجسية اه والله ذي ما بقولك كدا 🤷🏻‍♀️🤷🏻‍♀️

أمال ايه 🤔🤔

👺ضحايا نرجسيين وبيمارسوا السلوك النرجسي كنوع من البرمجة العصبية هما اتعودوا علي رد الفعل دا في الموقف دا فبيعملوه بدون وعي .

👺شخصيته مضطربة فبيقلد السائد أو ماشي بنصائح الآخرين لكن هو مش عارف بيعمل ايه ليه .

👺شخص فصامي يعني مش بيعرف يعيش علاقات طويلة ومبيعرفش يقرب من حد فأنت تفتكر أن دا صمت عقابي لكن هو لا صامت ولا متنيل هو مش عارف يعني ايه علاقات ولا يعني ايه مشاعر اتأذي في طفولته لحد ما ماتت كل خلايا المشاعر والأحاسيس عنده .

👺مشافش تربية عادي جدا أهله لا متربيين ولا كانوا فاضيين يربوه وارد برده 🤗🤗

👺ممكن انت الي شخصيتك ضعيفة وحدودك مش قوية فبتخلي الناس تستغلك فلو قويت حدودك وثقتك في نفسك المعوج هيتعدل 🙈

كيف يمكن تشخيص الاضطرابات النفسية ؟

 مش كل حد فيه صفة مش عجبانا نقول عليه نرجسي عشان يكون كدا لازم يقعد مع متخصص ويتعمله اختبارات مش الكام سؤال الي علي النت لا إختبار بجد من متخصص ويتشخص كدا ونشوف درجة النرجسية ايه وهل في اضطرابات تانية ولا لا .

أسباب اضطرابات الشخصية والسلوكية 

معظم المضطربين اتربوا في أسر مسيئة أو اتعرض لاذي في طفولته واضطرابات التنشئة كتير مش نرجسية بس واحيانا الأعراض بتتشابه وممكن وراثة بعض الاضطرابات بتتورث خصوصا لو الشخص جيناته قابلة لدا .

طبعا مش عايزة افكرك أن محدش بيعرف يصنف نفسه ولو لاقيت نفسك سوي متزعلش وتدور علي اي اضطراب تلزقه فيك عشان متحسش بالغربة عادي ممكن تطلع انسان طبيعي يعيش ويتعايش.

مشكلتنا اننا بقينا نصنف بعض بالاضطرابات ونحاول نلزق ببعض التهم دا كذا ودا كذا بدون وعي كافي بمجرد سماع فيديو او قراءة بوست بدون تحري أو البحر لمتخصص للمساعدة .

ايا كان اضطراب الي قدامك لو عندك حدود قوية وثقة في نفسك بشكل كاف ومحافظ علي قيمك ومبادئك فأنت اقوي من اي حد الحل عندك انت مش عند حد تاني .

الخاتمة

يجب الحذر من المشاعر السلبية والضغينة التي تسببها هذه المنشورات والفيديوهات لأنها ممكن أن تؤدي لهدم الأسر والقطيعة وقطع ثلة الرحم بشكل خاطئ لمجرد زيادة المشاهدة .

فانتبه تكون انت السلعة الي بيستغلوها عشان يرفعوا نسب المشاهدة ويتربحوا من آلامك ومشاكلك والتلاعب بمشاعرك وافكارك .

وفي النهاية محدش سوي بس فيه بيقاوم نفسه وفي لا وفي ناس اضطراباتهم تحتمل وفي لا وفي اضطرابات أخري اخطر من النرجسية يتم تشخيصها خطأ أنها نرجسية . 

#May_Saleh