ابدأ الان بكتابة المحتوى على منصة كتاب القدس
كرباج ورا يا اسطى
احمدالسعيدالفقى
لبتوع الواسطة
كرباج يطرقع
كرباج يفرقع
على القفا
وعلى الودان
خلي شمس النهار تطلع
والمستخبي يبان
على كل ضمير مبقع
وكل واحد بيخدع
وعامل فيها بهلوان
كرباج يلسوع
كل واحد بيطمع
فى قوت الغلبان
ماهي مش وسية
فيها تبرطع
وتعيش فى أمان
ومش عشان قادر تدفع
توصل لأعلى مكان
كرباج للحكومة
كرباج للبرلمان
كرباج للبومة
وشوية الغربان
اللى نهبونا
وعيشونا فى حرمان
كرباج للمطبلاتية
بتوع الإعلام
نازلين طبل وزمر
وكله بالأمر
من السلطان
وإن جيت للجد
دول أكتر حد
يستاهل الإعدام
وخليه يفرقع
عشان الكل يسمع
صوت الشعب الغلبان
وهو بيتوجع
من الظلم والحرمان
جايز الحق
فى يوم يرجع
والفقير
يبات فى يوم شبعان
هذا المحتوى ملك للمسؤول alqudsbook.com موقع
© alqudsbook.com. كل الحقوق تعود الى كتاب القدس. صمم ل كتاب القدس