ابدأ الان بكتابة المحتوى على منصة كتاب القدس
عبد الموجود
موجود
لأ مش موجود
مسافر من مدة
ومش عارفين
أمتى هيعود
هج وسافر
ومن الآخر
فات لنا العار
واحنا قبله
كنا كبار
وعمد
من جدود الجدود
خرب الدار
وسقانا مرار
وشفنا معاه
سنين سود
كانت البيوت عمرانة
والناس شبعانة
ولما جانا
جاب الفقر في ديله
و يا ويله
يا سواد ليله
اللي يفكر
يبص بعينه
لننوس عين أمه
يهيج و يزوم
ويقعد و يقوم
والمظلوم
عينه ما تشوف النوم
وقيامته تقوم
ما هو ما لهش لزوم
ولا بين الناس معدود
ما احنا
في زمن عبد الموجود
زمن المش
اللي مليان دود
زمن الميت وش
واللي مايعرفش
حسرة عليه
وعلى شبابه المفقود
طبل وارقص وزمر
هلل و شخلل و شمر
يتفتحلك
كل طريق مسدود
إعقل و بص و دور
و شوف مين فيها
عمر
و مين إنكتبله الخلود
جمل وقص و غير
وبدل في الحقايق
و زي ما خيالك المريض
يصور
إنك الوحيد اللي فاهم
و إنك المنقذ
ومش فارق
معاك إن المركب تغرق
المهم إنك
تبقى إنت اللي سايق
حرام عليك
ركز فوق
اللي جاي
بالنسبة للي فات
يدوب دقايق
و يا تلحق تنط
من المركب
يا تغرق معاها
والله ماهو فارق
الرحلة خلاص
قربت من النهاية
شفنا فيها العجب
حرام عليك كفاية
الصبر له حدود
واحنا صبرنا عليك
ياما يا عبد الموجود
و ياريت تفارقنا
و لوجه الله تعتقنا
شبعنا كلام
و زهقنا
وعود
مع إن الخير موجود
لكن مش لينا
الخير
للي معاه واسطة
أو له سلطة
واللي له ضهر
عليه مسنود
لكن الغلابة
عيني عليهم
يتعبوا ويكدوا
و يبنوا و يهدوا
و يا عيني
الجوع كافر
والحيل مهدود
و
من الآخر
لو مش قادر
في هدوء غادر
و الستار موجود
الستار موجود
أحمد السعيد الفقي مصر
هذا المحتوى ملك للمسؤول alqudsbook.com موقع
© alqudsbook.com. كل الحقوق تعود الى كتاب القدس. صمم ل كتاب القدس
